Nei har debút as dichter mei Tsjintwurdich is alles better yn 2024 set Gabrielle Terpstra in folgjende stap yn har skriuwerskip. De podcastmakker en auteur, ûnder mear bekend fan Gabrielle en Arjan bedoele it net ferkeard en de kollums op Goeie.frl, komt no mei har earste roman: Geller. It boek ferskynt by Utjouwerij De Ryp.
Terpstra hat in ynkringende persoanlike skiednis dy’t gauris trochklinkt yn har kreative wurk. Har libben waard tekene troch ferslavingen yn har famylje, en al jong waard se sels ek mei dy wrakseling konfrontearre. Yn har profyl op de webside fan Tresoar lit Terpstra witte dat se graach oait nochris in boek skriuwe wol oer dy ûnderfiningen. Oft Geller dat ferhaal fertelt, kinne lêzers by de offisjele presintaasje sels ûntdekke.
Boeklansearring
Op moandei 10 novimber is de boeklansearring yn Keunstnerspark Asgaard (Kealledykje 87, Ljouwert). De jûn wurdt presintearre troch Dichter fan Fryslân Arjan Hut, mei wa’t Terpstra ek har podcast makket. Te gast binne ûnder oaren Gysbert Japicxpriiswinner Elmar Kuiper, dy’t in koart ferhaal foarlêze sil, en útjouwer Hille Faber, dy’t mear fertelt oer it ûntstean fan Geller. De roman kriget no al priizgjende wurden mei. Auteur Anne-Goaitske Breteler neamt it “in rau, kwetsber en moedich ferhaal dat ûnder de hûd krûpt”, wylst skriuwer Sipke de Schiffart it hat oer “in coming-of-ageroman dy’t yndruk makket, mei drûge humor en prachtige observaasjes.”
Yn it koart
Moandei 10 novimber
19.30 oere (ynrin fan 19.00 ôf)
Asgaard Ljouwert
