Op tongersdei 27 juny om 19.30 oere is kafee De Gouden Leeuw it dekôr foar de Fryske SLAM 2024. Dy jûns sille tsien talintfolle dichters it tsjininoar opnimme yn in poëzywedstriid dêr’t de Fryske taal en kreativiteit sintraal yn steane.
De dichters dy’t harren wurk bringe sille, binne Marije de Lange, Kees de Vries, Carla van der Zwaag, Karst Tjoelker, Lara Kool, Sigrid Kingma, Martsje de Jong, Syds Wiersma, Tamara Feddema en Ypie Bakker. Elk fan harren sil stride om de titel ‘Bêste Fryske Foardrachtskeunstner’ en in jildpriis fan € 500. Ferline jier wûn Syds Wiersma de slam en hy sil no syn titel ferdigenje.
De organisaasje fan de Fryske SLAM 2024 leit yn hannen fan Arjan Hut, Dichter fan Fryslân, en Gabrielle Terpstra. It publyk spilet in wichtige rol op de jûn, om’t se op har favorite dichter stimme kinne en dêrmei bydrage oan de úteinlike útslach. De jûn begjint om 19.30 oere en neist de foardrachten fan de dichters sil der ek in muzikale útfiering fan de Ladybirds wêze; dat soarget foar in fariearre programma. It publyk wurdt útnûge om te genietsjen fan in ûntspannen en ynspirearjende jûn fol poëzy en muzyk.
Elkenien is fan herten wolkom om de dichters oan te moedigjen en te stimmen op syn of har favorite foardracht. De Fryske Slam 2024 belooft in jûn te wurden om net te ferjitten; in jûn dêr’t de Fryske taal yn fierd wurdt. De tagong is fergees en oanmelde kin fia fryskepoezyslam.eventbrite.nl.
Datum en tiid
Tongersdei 27 juny 2024, oanfang 19.30 oere – ynrin fan 19.00 oere ôf.
Lokaasje
Kafee De Gouden Leeuw yn Tresoar, Bûterhoeke 1 te Ljouwert.
