Ofrûne sneon, yn omloop 3 fan it WK Frysk Damjen, wist Willem Schaap út ’e middenmoat te profitearjen fan in te aventoerlike set fan syn tsjinstanner Marten Walinga, om dêrnei de lieding te nimmen. Snein, yn omloop 4, ferlear er dy posysje troch sels in riskante set te spyljen. Syn tsjinstanner, Jelle Wiersma, fierde fuortendaliks de druk op en twong him om yn in kwetsbere posysje, dêr’t er in soarchfâldich tarette djippe kombinaasje yn útfiere koe. Nei wat tsjinakseljen woe Willem Schaap it wol leauwe.
Mar der folge noch mear moais yn dy omloop. Dicky van der Meer (spyljend tsjin ien fan de favoriten, Teake Kooistra) miste in prachtige winnende kombinaasje, dy’t tafallich ek de iennige spylbere set wie. Foar in ferbjustere publyk broazele syn stelling stadichoan ôf.
Fedde Kramer en Hein de Vries spilen dêrfoaroer in folslein lykweardige partij, dêr’t net ien fan beiden in flater yn makke, oant Hein de Vries tocht dat er feilich in kombinaasje nei daam tariede koe. Fedde Kramer brocht lykwols in ûnferwachte offer en naam syn tsjinstanner dêrnei yn in izeren greep dêr’t gjin ûntkommen út mooglik wie.
Op deselde wize makke Folkert Groenveld in perfekte kombinaasje klear en fierde dy út tsjin Lukasz Kosobudzki. Mei Ties Slagter en Marten Walinga op kamp, Auke Zijlstra dy’t Aleksej Domchev fersloech en Petra Duskova dy’t Malte Schulz fersloech, binne der mar leafst tsien spilers dy’t Jelle Wiersma op ‘e hakken sitte, dy’t foar de ein fan de dei noch weromsmiten wurde kin nei it fiifde plak.
Utslaggen omloop 4
Wiersma – Schaap 1 -0
Marten Walinga – Ties Slagter kamp
Groenveld – Kosobudzki 1 -0
Kramer – De Vries 1 -0
Kooistra – Van der Meer 1 -0
Schulz – Duková 0 -1
Zijlstra – Domchev 1 -0
Richardson – Walinga 1 -0
Stân nei omloop 4
Jelle Wiersma 3,5 p.
Willem Schaap, Folkert Groenveld 3 p.
Marten Walinga, Taeke Kooistra, Fedde Kramer, Ties Slagter 2,5 p.
Hein de Vries, Lukasz Kosobudzki, Petra Dusková, Auke Zijlstra 2 p.
Dicky van der Meer, Porter Richardson 1,5 p.
Malte Schulz 1 p.
Aleksej Domchev 0,5 p.
Siward Walinga 0 p.
Taheakke: Toernoaiboek WK2024
Foto thússide: Hein de Vries (l.) en Fedde Kramer (foto: St. WFD)
